مجموعة قصايد الشيخ ناصر بن حمد

هاااااااي

كيفكم؟

اليوم جايبه لكم مجموعة قصايد من قصايد الشيخ ناصر

.:: دار الحضارة ::.

تفنن يا القصيد وزخرف الدنيا شعر وألحان
ولا خير بقصيد ٍ ما يهزّ الروح بألحانه
سلام الله على دار الحضارة دار أبو سلمان
سلام الله على شعب البلاد وكل سكانه ..
على أرض المملكة نفرح وننثر للعروس ألوان
على البحرين يا درّة قلوب الشعب يا دانه
تبارك يا وطننا جعل جوّك بالفرح عمران
ما دام ان القلوب تذوب في حبّك وفرحانه
تبارك يا وطنّا يا وطن يا غالي الأثمان
تربينا على حبّه وضم الكل باحضانه
على حب ومحبة ضمّنا بأرضه أهل وأخوان
تحت ميثاق من حبّ الوطن صانه وما خانه
وتبارك يا المليك اللي عيونه للجميع أحضان
حضن شعبه بعينه وامتلا قلبه ووجدانه
حمد هذا حمد عز البلد له في المعالي شان
مكانه فوق هام السحب والله رافع ٍ شانه
شجاع ٍ له مواقف تربك الفرسان بالميدان
حكم داره بشرع الله وأخذ من نهج قرآنه
سياسي ٍ محنّك بالسياسه ما يبي برهان
يقود الدار للمجد الكبير ويبني أركانه
تطورنا وسابقنا مع العالم كثير أوطان
تحت عزمه وحزمه للأمور وقوة إيمانه
سجّل المملكة حافل مع التاريخ والبلدان
وقلب المملكة مفتوحةٍ للخير بيبانه
حفظك الله يا دار الحضارة دار أبو سلمان
وحفظك الله يا شعب البلاد وكل سكانه

.:: زاهية يالمملكة ::.

يا هجوس الشعر فزّي يا هجوس
دام جالك في وسط قلبي مجال
والبسي يا دارنا أحلى لبوس
وانثري ورد الفرح والاحتفال
كل عام ٍ وانتي يا بلادي عروس
زاهية يالمملكة هيبه وجمال
وانتي عيد ٍ واحتفاله بالنفوس
وانتي لوحة عبقرية الخيال
من غلاتك ما نبي ترابك ندوس
لو مشينا نمشي فوقك بالعدال
واحنا يا البحرين لو راسك نبوس
ما طلعنا من جزا فضلك محال
كم تعلمنا على حبك دروس
والوفا لك يا وطن ما به جدال
وانتي شمس المجد وأمجاد الشموس
بك رجال العز وبك عز الرجال
بك حمد راس الزعامة بين روس
قايد النهضة وبه طيب الخصال
الحكيم اللي يقوس الرأي قوس
الكريم اللي عطاياه الجزال
يا جعل دربه مع الوقت امحروس
والله يحفظه من صروف الليال
وكل عام ٍ وانتي يا بلادي عروس
زاهية يالمملكة هيبة وجمال

.:: عيدي يالمملكة ::.

القصايد ما تجي بالكيف والشاعر تغنّا ..
شاعر ٍ يعسف خيول الشعر ويهلّ القصيدة ..
دام عيد المسلمين ودام عزّك يا وطنّا ..
عيّدي يا المملكة بالخير وأيامك سعيده
عيّدي يا دارنا والشعب في حضنك تهنّا
تحت ظل القايد اللى سيرته دايم فريده ..
عاد عيدك يا ملكنا يا معلمنا وحنّا ..
لك جنودٍ نرخص الأرواح ونرد المكيده
يوم حب المملكة في قلوبنا حل ّ وشحنّا
كلنا فدوة تراب المملكة يوم الشديده
عاد عيدك يا حمد والشعر في مثلك يغنّا ..
المليك اللى كساه الله بأخلاق ٍ حميده ..
الكرم والطيب في يمناه عنها ما تونّا
والمراجل كلّها تسري مع الدم بوريده
فاتح ٍ قلبه لشعبه ما يرد اللي تعنّا
ان ضحك لك نور وجهه يجلي الهم ويبيده
حاكم ٍ يحكم بشرع الله وحكمه ويتمنّا
يصبح العالم سلام ويفرح العالم إبـ عيده
وعيدي يا دارنا والشعب في حضنك تهنّا
وعيدي يا المملكة بالخير وأيامك سعيده
من قصايد شاعر ٍ لاجلك بيوم العيد غنّا
شاعر ٍ يعسف خيول الشعر ويهّل القصيدة

.. قصائــد مناسبــات ..

.:: الشور شورك ::.

( هذه القصيدة مهداة الى صاحب الجلالة ملك مملكة البحرين حفظه الله )

الشور شورك والهداية على الله ...
والرأي منكم .. نشتريه بملايين ...
لأنك حكيم وكل درب ٍ تدلّه ....
ولأنك لنا عين ومكانتك بالعين ...
يا سيدي .. والليل فيه الأهلّه ..
نقرا بها بعض العبر والعناوين ...
درب ٍ مشينا فيه محد ٍ وصل له ..
غير الرجال العاقلين الحكيمين..
يا سيدي رايك بقلبي محلّه ...
نمشي عليه ونفتخر به من سنين ...
ويا صاحبي واللي سأل عنه قلّ له
هذا حمد راس الرجال العريبين ..
هذا حمد بين النجوم المطلّه ..
نجم ٍ تعدى فوق .. حدّ السماكين ..
المجد كنّه بالقدر مرسل ٍ له ..
والطيب وان قلنا حمد قال نعمين ..
اللي ربينا تحت حكمه وظلّه
منه تعلمنا علوم السلاطين ..
الراي رايه .. والفخر فيه كله ..
والشور شوره .. نشتريه بملايين ..
لانه حكيم وكل درب ٍ يدلّه ..
ولأنه لنا عين وسكن داخل العين ...

.:: انت يا حمدان ::.

القصيد اللي يهزّ الروح فنّه ...
ما تجيبه غير لحظات البطوله ...
وأنت يا فكري تفنن ثم غنّه ..
واذكر اللي له مع الأشعار صوله
كن شعري كل ما قرّبت منّه
ما يبي غير أنت يا حمدان حوله
وانت يا حمدان فارس يشهدّنه
كل ساحات التفاخر والرجوله
كاسب ٍ للمرجلة من صغر سنّه
وكانه النوماس عز الله يطوله
وأحمد اللي لا نشدت الطيب عنّه
فارس ٍ للطيب ومروّض خيوله
معتلي لا صار في المضمار كنّه
يرعب الفرسان من لحظة وصوله
يا ولد من يعرف الحرف ويعنّه
واحد ٍ يسوى من العربان دوله ..
آل مكتوم الكرام أهل الأسنه
يشهد التاريخ في عرضه وطوله
ماخذين المرجله من غير منّه
والمراجل ما تحصّـل بالسهوله
والشعر وسط العروق اللي تكنّه
يفتخر لا صار له عز وبطوله

.:: رسالة الى شباب الوطن ::.

الشعر في عيني له أدوار .. وأدوار ..
تبرق بروقه ثم ترعد رعوده
الحمد لله وابتدا اليوم مشوار ...
مشوار جيل ونفتخر في وجوده ....
والحمد لله كل ما نادت الدار ...
قلنا الوطن غالي وحنّا جنوده ...
نحمى حماه وندفع اطماع الأشرار ..
بالدم والأرواح حنّا صموده...
عند الوطن والعز يا رخص الأعمار ..
حنا شبابه دوم حنّا وقوده ...
كل ٍ يشمّر عن ذراعه ويختار ...
درب ٍ يزيد الدار عزّ ويزوده ...
شبابنا يشبه من الزرع الأثمار ..
أجدادنا تزرع وتقطف وروده ...
ولا خير في جيل ٍ على الدار ما غار ...
ولا خير في جيل بقلبه بروده ...
حنّا الضمير الحيّ في وقت الإعمار ..
حنا مشاريع البلاد وجهوده ...
حنّا لها نهضة معزّة ومقدار ..
وحنّا لها مجد ٍ بعيده حدوده ...
في ظل ابونا القايد الوالد البار ...
اللي فعوله طيّبه وامحموده ...
يشهد له التاريخ في كل الاخبار ...
وتشهد له أهل الطيب من طيب جوده ..
واختامها صلوا على سيد الاخيار ..
ولا خير في جيل ٍ بقلبه بروده ..

.:: خـــــــالــــــــد ::.

( إهداء خاص إلى سمو الشيخ خالد بن حمد آل خليفة )

للقصيد أحكام .. وأوزان .. وقوافي ..
وانت علمك يا أبيض الكفين وافي ...
والقصيد اليوم يوم إني كتبته ..
ما كتبته من غرام ومن تجافي ...
كاتبه في مدح رجل ٍ تعرفونه ....
امتلا معناي فيه وطاب قافي ...
خالد اللي في عروق القلب خالد ...
العضيد اللي لجرح الوقت شافي ...
شيخ ٍ الله حط فيه الحب كله ...
لبّسه ثوب ٍ من الأخلاق ضافي ..
يا رفيق ٍ كل ما ضاقت بصدري ....
جيت له والله يعلم كل خافي ....
صورته تبقي بعيني واحتضنها ...
بالنهار وبالمسا لو كنت غافي ...
يا ذراعي يا يميني يا عويني ..
يا سنادي وان تغيّر كل صافي ...
فيك كل المدح لايق وانت لايق ..
وآخر أبياتي على قلبك عوافي ..
والقصيد اليوم يعجز به لساني ..
لانك أكبر من حكايات وقوافي ..
.. قصائــد خاصــة ..

.:: يعجز الشعر ::.

قالوا إنك تحب وقلت ليه السؤال ؟
كل شخص ٍ يحب وكل شخص ٍ يميل
والهوى ديرة ٍ ما بين صد ووصال
دوم فيها نزول ودوم فيها رحيل
يا عرب والقلوب أشوفها بألف حال
بين قلب جريح وبين قلب ٍ قتيل ..
والا أنا لو باحب أحب بنت الخيال ..
نادره ما لها بالناس شبه ومثيل ...
فاتنة ناعمه فيها هدوء ودلال ..
حاوية كل زين وكل طبع ٍ أصيل ..
من يعرف الجمال يقول هيّ الجمال
وصفها في قصيدي يشبه المستحيل
كن في وجهها صبح ٍ ضحك لي وقال
يا صباح المحبة من خليل لخليل ..
وكن في عينها رمش ٍ ينادي تعال ..
واعذابي من الرمش الكسول الكحيل ..
شعرها ليل ٍ أسود فيه صمت وجدال ..
إن تحرك يضيع الصبح بأطراف ليل ..
إن تناثر جديله من يمين وشمال ..
ضمني في بياض الصدر تحت الجديل ..
والشفايف مثل جمر ٍ يزيد اشتعال ..
ودي أضمّ جمره لين أشبّ الفتيل ..
إن مشت كنها غصن ٍ مع الريح مال ..
هزّه الشوق من فوق خصر ٍ نحيل ..
كن فيها رسوخ ٍ علّمته الجبال ..
وكن فيها شموخ ٍ علّمته النخيل ..
تجمع الكل فيها من جمال الخصال ..
بنت قلب ٍ رشيد وبنت عقل ٍ ثقيل ..
كامله والله اللي يستحق الكمال
صورة ٍ كل ما فيها فريد وجميل ..
يعجز الشعر عنها حتى لو في الخيال ..
كنه يقول يا ناصر ترى مستحيل ..

:: سلام الله ::
سلام الله سلام الله ...على حبك سلام الله
سلام أكبر من أشواقي .. ومن عمر الهوى كله ..
حبيبي لو يلوموني .. وعلى حبك يحسدوني ..
أغني لك سلام الله .. على حبك سلام الله ..

تغيب سنين عن عيني .. وتبقى داخل أعماقي
حبيب ومالك سنيني .. وأيامي وميثاقي ..
غرام ٍ بينك وبيني .. تلوّن داخل أوراقي ..
يغني لك سلام الله .. على حبك .. سلام الله ..

حبيبي يا اجمل أحلامي .. يا كل العمر وأوقاته ..
فداك العمر وأيامي .. ولك قلبي ونبضاته ..
حبيبي لو يطول الوقت .. وتسرقني مسافاته ..
أردد لك وأغني لك .. على حبك سلام الله ..

كثير اللي يلوموني .. وكثير اللي يحسدوني
على حبك يعذلوني .. واقول اقول خلوني ..
أغني له وأردد له .. على حبه .. سلام الله ..
سلام أكبر من أشواقي .. ومن عمر الهوى كله ..

:: اللي على البال ::ياللي على البال تطري وانت ما تدري
وش ذنبه اللي يحبك وانت خليته ؟
وش ذنب قلب ٍ رسم لك حبّه العذري؟
وش ذنب دمع ٍ علي طاريك هلّيته ؟
لو كان عمري بيدّي فدوتك عمري
لكنّ عمري بيدّ اللي ترجّيته
إنه يرد الزمان اللي علي خبري
وأعيش ليلك وحلم ٍ كم تمنيّته
يوم إن قلبك بصدري وأنت في صدري
ضيف ٍ سكن بالحشا وأثر الحشا بيته
الأيام تجري وعمري بالشقا يجري
حتى الشقا منك رافقته وحبيّته
أصبر على حالتي ويملّني صبري
وأعيش في لوعتي وآقول يا ليته
والليل في ناظري يا صاحبي يسري
والشعر لاجل الهوي جبته وغنّيته
وإذا تكلم عذولي قلت له عذري
إن الهوى يذبح العاشق .. وأنا جيته
وإلا أنت ما تدري إنك كل ما تطري
يصيح بين الحنايا شيْ خليته !!

.:: اسمحيلي يالحبيبه ::.

اسمحيلي يالحبيبه لو حضنتك في عيوني
تفرح عيوني بشوفك وارتوي وأروي ضماها
يامن لكم فز قلبي وزايدٍ منكم جنوني
حتي لو كانت بعيده مايفارقني حلاها
ياما حاولت اني انسى مامضى لي واعذريني
والولع زاد وغلبني ياجعل روحك افداها
ليتك بجنبي قريبه ... ليتك بداري تجيني
ليت يا اغلي حبيبه نورك ينوّر سماها
انتي ذوقي وانتي شوقي وانتي يا عمري حنيني
جل من صور جمالك آية ٍ والله عطاها
أنتي الدنيا ومافيها وترخص لك سنيني
ياملاكٍ في عيوني صوّب الخافق هواها
زينها زايد ولايق .. سحرها الطاغي ثميني
تاهت حروفي بحسنها وضاعت الكلمه معاها
ياقوافي اوصفيها وانصفيها واسعديني
اوصفي باحلى المعاني واوصلي اخر مداها

:: هلا باللي له الخافق يهلّي ::

هلا بك يا بعد روحي ومن لي
وكل ٍ له خليله وانت خليّ ...
هلا في شوفتك يا روح روحي
هلا يا راحة عيوني وظلّي ...
إذا شفتك تفيض بحور حبي ...
وفي بحرك أذوب بشوق كلّي ..
اخذني روح ما تفرح بدونك ...
وعمر ٍ في ظلالك .. مستظلّي ...
واخذني بسمة ٍ تفرح بعينك ...
وقلب ٍ جاك راضي مسفهلّي ..
واخذني ليلة ٍ بين الليالي . ..
ضياها نور وجهك يوم ظلّي ...
وجودك في حياتي شيْ ثاني ..
غرام وليل وأشواق وتغلّي ...
يفزّ القلب في شوفك وأغنّي ..
( هلا باللي له الخافق يهلّي ) ..
هلا بك يا بعد عمري ومن لي ..
وكل ٍ له خليله وانت خلّي ..

.:: يا ظبيتي ::.

من قال إني بالهوى يوم حبيت ..
ومن قال إني ضايع ٍ في هواها ...
مريت في درب المحبين مريت ..
وأخذت عبرات الليال ومساها ...
أذكر غرامه كل ما اصبحت وأمسيت ..
وانا احسب ان القلب سج ونساها ..
يا ظبيتي يا ما وياما تمنيت ...
إني معك والروح تلقى رضاها ...
أعيش عمري بين يا عل يا ليت ..
والنفس ضاقت ما تحقق مناها ...
والحب لو قالوا وش الراي رديت
انه كبير وصورته محتواها
مثل المليك اللي كسب حب مع صيت ..
وأخذ مكانه في القلوب وعطاها ...
يا ظبيتي واذا ذكرتك تغنّيت ....
بأحلى بيوت الشعر وأعذب غناها
فيك القصايد تفتخر بيت مع بيت ...
وانا اذكر اني كنت ضايع معاها ...

.:: من يقول إن الهوى ::.

من يقول إن الهوى هذا حرام ....
يا شديد ارجوك لا تعتب عليّه ...
انطلق للحب سهم ٍ من غرام
وصابنا سهمه وجمّعنا سويه
خط قلبي له حروف ٍ من كلام
يهدي لمحبوبتي أغلى هدية
يا سلام الله عليها والسلام ..
يا خفوقي سولف اللي صار ليّه
بالغلا كم أجرمت فيني إجرام ..
خاطفه شوفي بنظرة أولية
ليتك تشوفه مثل بدر التمام ...
وجهها سبحان من صور سميّه
نجمةٍ تسطع بديجور الظلام
نور كل الكون في صبح وعشيّه
شفت فيه اللي جذبني للهيام ...
وما قويت أكتم ونار الحب حيّه ...
صاحبي يا صاحبي كف الملام ...
دام قلبي له مع الغالين نيّه ...

.:: لا من ذكرتك ::.

لا من ذكرتك يفزّ الشعر والقلب هاض ..
وآجر فيك القصايد وأحكم أوزانها ...
لعيون من خلّت الدنيا بياض إفـ بياض ...
بنت ٍ تقول الحسن والزين .. عنوانها ...
ما هي من أهل الكويت ولا من أهل الرياض ...
السر مكتوم .. في قلبي .. على شانها ...
قلب ٍ كتم حبّها لين الهوى منه فاض ...
وبين الحنايا جداولها ووديانها ...
يا مهرة الواقع اللي ما لمسه افتراض ...
يا سيرة الحب يا دنياي وأركانها ....
موت ٍ لقيته بعينك وانت عينك حياض ...
كن المنايا وسهم العشق باحضانها ...
برق ٍ لمع في خدودك يوم شفته وناض ..
كنّه يصوّر حياتي لحظة إيمانها ...
بإنك جميل وجمالك ما عليه اعتراض ...
وإن القصايد بوصفك يعجز لسانها ...

ماشاء الله عليه مبدع

مشكور خيتو ع القصايد

ما شاء الله كتب واجد خخخخخخخ حتى تعبت اقرأ يأخي ههههههههههههههه

بس عجبني قصائد ألي تخص الحب لأنها مرة شي بصراحة وقوية بعد

اشكرك ع مجهودك ف وضعها وتسني لنا الفرصة بقرأتها وتمعن بمعانيها دافئة

تسلمي نوري وربينا يخليك

ما مقصرة يا بتكوه خخخخخخخخخ

حبيبي يا اجمل أحلامي .. يا كل العمر وأوقاته ..
فداك العمر وأيامي .. ولك قلبي ونبضاته ..
حبيبي لو يطول الوقت .. وتسرقني مسافاته ..
أردد لك وأغني لك .. على حبك سلام الله ..

كثير اللي يلوموني .. وكثير اللي يحسدوني
على حبك يعذلوني .. واقول اقول خلوني ..
أغني له وأردد له .. على حبه .. سلام الله ..
سلام أكبر من أشواقي .. ومن عمر الهوى كله ..

عجبتني هالابياااات تسلمي على الذووق

يسلموووووووو الجميع على المروووووووور
ويعطيكم العافية

ابصراااااااااااااااااااااااااااحه رووووعه قصايده

تسلمين اختي على النقل الحلووو ويعطيج العافيه

ولا تحرمينا من مواضيعج الحلووووووه

يطيج عاااااااااااااااافيه على هذا الابيات الشيخ ناصر بن حمد الخلفه

يسلمووووووووووووووووووووووووووو على هذه القصاااااااااااااايد

مشكووووووووووووررررررين فديتكم على الرد Very Happy

» القصيده اللي القاها الشيخ حمدان (فزاع )لفوز اخيه
» ادعية بصوت الشيخ احمدالعجمي
» الشيخ سلطان بن محمد القاسمي والبلوش
» فيديو الشيخ حمدان(فزاع )*_^(امسيه )
» قصة البطل ( الشيخ ميرزا بن بركت البلوشي ) الله يرحمه